काठमाडौं /
नेकपा एमालेले पालिका चुनावको तयारीका लागि भन्दै राष्ट्रिय भेला बोलाएको छ। पर्सि मङ्सिर २ र ३ गते काठमाडौंमा आयोजना गर्न लागेको राष्ट्रिय भेलामा ३ हजार ५१४ जना सहभागी हुने आज भएको पत्रकार सम्मेलनमा पार्टीको प्रचार विभाग प्रमुख निरज आचार्यले जानकारी दिनुभयो। पार्टीको केन्द्रीय नेतृत्वदेखि पालिका तहका कमिटीका पदाधिकारी तथा पार्टीबाट निर्वाचित जनप्रतिनिधिसम्मको सहभागिता रहने भेलालाई आउँदो पालिका चुनावको तयारी र पार्टीको वैचारिक तथा सङ्गठनात्मक एकता सुदृढ गर्ने अवसरका रूपमा एमालेले लिएको छ।प्रचार विभाग प्रमुख आचार्यका अनुसार भेलामा पालिका चुनावको रणनीति, उम्मेदवार छनोटको मापदण्ड, संगठन परिचालन, जनपरिचालन र प्रचारप्रसारको योजनाबारे छलफल हुनेछ। त्यस्तै, पार्टीको पछिल्लो राजनीतिक परिस्थिति, सरकारको कामकारबाही र आगामी चुनावमा पार्टीले लिने एजेण्डाबारे पनि भेलामा गहन छलफल हुने उनले बताए।भेलामा केन्द्रीय कमिटी, प्रदेश कमिटी, जिल्ला कमिटी, पालिका कमिटीका पदाधिकारी, जनसंगठनका प्रमुख, सांसद, प्रदेश सांसद तथा पालिका तहबाट निर्वाचित जनप्रतिनिधिहरू सहभागी हुनेछन्। दुई दिनसम्म चल्ने भेलामा विभिन्न समूहमा छलफल गरी निष्कर्ष निकालिने र त्यसलाई पार्टीको चुनावी कार्ययोजनामा समेटिने आचार्यले जानकारी दिए।एमालेले यस भेलालाई चुनावी अभियानको औपचारिक सुरुवातका रूपमा पनि लिएको छ। पालिकाको चुनावमा देशभर बलियो उपस्थिति जनाउने र अधिकांश पालिकामा जित हासिल गर्ने लक्ष्यका साथ पार्टीले संगठनलाई चुस्त बनाउने तयारी गरेको छ।पत्रकार सम्मेलनमा आचार्यले पार्टीभित्र देखिएका असन्तुष्टि र गुटगत समस्यालाई पनि भेलाले सम्बोधन गर्ने बताए। उनले भने, “भेला पार्टीको वैचारिक तथा सङ्गठनात्मक एकता सुदृढ गर्ने अवसर हुनेछ। सबै तहका नेता कार्यकर्ता एकै ठाउँमा भेला भएर साझा चुनावी रणनीति बनाउनेछौं।”यसैबीच, निर्वाचन आयोगले पालिका चुनावबारे दलहरूसँग मङ्सिर ४ गते परामर्श गर्न लागेको छ। आयोगले चैतभित्रै पालिका चुनाव गर्ने गरी सरकारसँग छलफल गरिरहेको छ। पालिकाका जनप्रतिनिधिको कार्यकाल आउँदो वैशाखमा सकिँदै छ।एमालेको यो राष्ट्रिय भेलाले पालिका चुनावको माहोल तताउने र अन्य दलहरूलाई पनि चुनावी तयारीमा जुट्न दबाब दिने राजनीतिक विश्लेषकहरूको अनुमान छ।






