काठमाडौं/

फिफाबाट निलम्बित अखिल नेपाल फुटबल संघ एन्फा को कार्यसमिति बैठक बोलाउन माग गरिएको छ।बैठक माग गर्नेमा वरिष्ठ उपाध्यक्ष वीरबहादुर खड्कासहित उपाध्यक्षहरू विराटजंग शाही, दीपक खतिवडा र दीर्घबहादुर केसी तथा सदस्यहरू महेन्द्र क्षेत्री, मनिष जोशी, पेमा डोल्मा लामा, रवीन्द्र चन्द, रुपेश अधिकारी, टिकाराम लामा र भरतबहादुर बुढथापा रहेका छन्। एन्फाको विधानको धारा ३१ को उपधारा २ अनुसार एक तिहाइ वा सोभन्दा बढी कार्यसमिति सदस्यले लिखित रूपमा माग गरेमा बैठक अनिवार्य रूपमा बोलाउनुपर्ने व्यवस्था छ। सोही व्यवस्थाअनुसार वरिष्ठ उपाध्यक्ष वीरबहादुर खड्कासहित ११ जना कार्यसमिति सदस्यले बैठक आह्वानको माग गरेका हुन्।बैठकका लागि पाँचवटा एजेन्डा प्रस्ताव गरिएको छ। एन्फाको वर्तमान अवस्था र त्यसको निकासका लागि खेलकुदका नियामक निकायसँग आवश्यक पहल तथा समन्वय गर्ने विषयलाई प्रमुख एजेन्डाका रूपमा राखिएको छ।त्यस्तै, एन्फाको निर्वाचनलगायत समसामयिक विषयमा छलफल गर्न पनि बैठक बोलाउन माग गरिएको छ।